📍 జంగారెడ్డిగూడెం | జూన్ 12, 2026 | DNN NEWS
ఏలూరు జిల్లా చెస్ అభివృద్ధి మరియు క్రీడాకారుల సంఘం (CDPAED) ఆధ్వర్యంలో, శ్రీ హంసా చెస్ అకాడమీలో నిర్వహించిన ప్రత్యేక కార్యక్రమంలో ఏలూరుకు చెందిన ప్రతిభావంతమైన చెస్ క్రీడాకారిణి ఎడ్ల ప్రేమి రక్షితను ఘనంగా సన్మానించారు.
ఇటీవల జరిగిన ఆంధ్రప్రదేశ్ రాష్ట్ర అండర్-13 చెస్ ఛాంపియన్షిప్లో ప్రతిభ కనబరిచి జాతీయ స్థాయి (National) చెస్ ఛాంపియన్షిప్కు అర్హత సాధించిన ప్రేమి రక్షితను ఏలూరు జిల్లా చెస్ అసోసియేషన్ అధ్యక్షులు శ్రీ కిరణ్ కుమార్ పాలూరి మరియు కార్యదర్శి శ్రీ కన్నా సూర్య నాగేశ్వరరావు కలిసి అభినందించి సత్కరించారు.
ప్రేమి రక్షిత త్వరలో పుదుచ్చేరిలో (Puducherry) జరగనున్న జాతీయ చెస్ ఛాంపియన్షిప్లో ఏలూరు జిల్లా తరఫున ప్రాతినిధ్యం వహించనున్నారు.
గత సంవత్సరం కూడా ఆమె రాష్ట్ర స్థాయి పోటీల్లో విశేష ప్రతిభ కనబరిచి జాతీయ స్థాయికి అర్హత సాధించగా, 2024 సంవత్సరంలో అండర్-17 విభాగంలో రాష్ట్ర స్థాయిలో ద్వితీయ స్థానం సాధించి జాతీయ పోటీలకు ఎంపిక కావడం ఆమె ప్రతిభకు నిదర్శనమని సంఘం ప్రతినిధులు పేర్కొన్నారు.
ఈ సందర్భంగా సంఘం అధ్యక్షులు శ్రీ కిరణ్ కుమార్ పాలూరి మాట్లాడుతూ, చెస్లో రాణిస్తున్న క్రీడాకారులను తగిన సమయంలో గుర్తించి ప్రోత్సహించడం, వారిని మరింత ఉన్నత స్థాయికి తీసుకెళ్లడం ఏలూరు జిల్లా చెస్ అసోసియేషన్ ముఖ్య లక్ష్యమని తెలిపారు. జిల్లాలోని యువ క్రీడాకారులకు అవసరమైన ప్రోత్సాహం, అవకాశాలు కల్పించేందుకు సంఘం నిరంతరం కృషి చేస్తోందన్నారు.
ఈ కార్యక్రమంలో చెస్ కోచ్లు, క్రీడాకారులు, తల్లిదండ్రులు మరియు సంఘ ప్రతినిధులు పాల్గొని ప్రేమి రక్షితకు శుభాకాంక్షలు తెలిపారు.
