జగిత్యాల, జూలై 17 (DNN న్యూస్): వర్షాకాలంలో చిన్నారులు సీజనల్ వ్యాధులకు త్వరగా గురయ్యే అవకాశం ఉన్నందున తల్లిదండ్రులు ప్రత్యేక జాగ్రత్తలు తీసుకోవాలని జగిత్యాల మల్టీ స్పెషాలిటీ హాస్పిటల్ పిల్లల వైద్య నిపుణురాలు డా. నీలోఫర్ సూచించారు.
ఆమె మాట్లాడుతూ, పిల్లలకు మరిగించి చల్లార్చిన లేదా శుభ్రమైన తాగునీటిని మాత్రమే ఇవ్వాలని, ఇంట్లో తయారు చేసిన వేడి, తాజా, పోషకాహారాన్ని అందించాలని తెలిపారు. బయట లభించే కలుషిత ఆహారం, చల్లని పానీయాలకు దూరంగా ఉంచాలని సూచించారు.
భోజనం చేసే ముందు, మరుగుదొడ్డి ఉపయోగించిన తర్వాత పిల్లల చేతులను సబ్బుతో శుభ్రంగా కడగించడం అలవాటు చేయాలని చెప్పారు. అలాగే ఇంటి పరిసరాల్లో నీరు నిల్వ ఉండకుండా చూసి, దోమల నివారణ చర్యలు చేపట్టాలని సూచించారు.
పిల్లలకు పూర్తి చేతుల దుస్తులు వేయించడం, అవసరమైతే దోమతెరలను ఉపయోగించడం, వర్షంలో తడిస్తే వెంటనే పొడి దుస్తులు మార్చించి శరీరాన్ని వెచ్చగా ఉంచడం అవసరమని పేర్కొన్నారు.
జ్వరం, దగ్గు, జలుబు, వాంతులు లేదా విరేచనాలు వంటి లక్షణాలు కనిపిస్తే స్వయంగా మందులు ఇవ్వకుండా వెంటనే వైద్యుడిని సంప్రదించాలని డా. నీలోఫర్ సూచించారు. అలాగే ప్రభుత్వం సూచించిన అన్ని టీకాలను సమయానికి వేయించడం ద్వారా అనేక వ్యాధులను నివారించవచ్చని తెలిపారు.
వర్షాకాలంలో పరిశుభ్రత, సమతుల్య పోషకాహారం, దోమల నివారణ చర్యలు, సమయానికి వైద్య సలహా తీసుకోవడం ద్వారా చిన్నారులను సీజనల్ వ్యాధుల నుంచి సమర్థవంతంగా రక్షించవచ్చని ఆమె వివరించారు.
📞 హెల్ప్లైన్: 8686866806
✍️ రిపోర్టర్: రియాజ్
📍 జగిత్యాల | DNN న్యూస్
