ఆంధ్రప్రదేశ్ రాష్ట్ర ఓపెన్ & మహిళల చెస్ జట్ల ఎంపిక పోటీలు ఘనంగా ప్రారంభం

📍 చీరాల జిల్లా | జూన్ 17, 2026 | DNN NEWS

ఆంధ్రప్రదేశ్ రాష్ట్ర ఓపెన్ మరియు మహిళల జట్ల చెస్ ఛాంపియన్‌షిప్ ఎంపిక పోటీలు 2026 బుధవారం చీరాలలోని డాక్టర్ అంబేద్కర్ భవన్, రైల్వే స్టేషన్ సమీపంలో ఘనంగా ప్రారంభమయ్యాయి. రాష్ట్రంలోని అన్ని జిల్లాల నుంచి 175 మందికి పైగా ఓపెన్ మరియు మహిళా చెస్ క్రీడాకారులు ఈ ప్రతిష్టాత్మక పోటీలలో పాల్గొన్నారు.

ఈ పోటీలను ఆంధ్రప్రదేశ్ స్టేట్ వెబ్సైట్ కన్వీనర్ శ్రీ పోలూరి కుమారస్వామి గారు మరియు బాపట్ల గౌరవ కార్యదర్శి శ్రీ అబ్దుల్ నబీ గారు గోజాల సుధాకర్ ITC యూనియన్ అధ్యక్షుడు మొదటి మూవ్ వేసి టోర్నమెంట్ను ప్రారంభించారు. జాతీయ స్థాయి పోటీలకు రాష్ట్ర జట్టును ఎంపిక చేయడానికి నిర్వహిస్తున్న ఈ ఛాంపియన్‌షిప్‌కు రాష్ట్రవ్యాప్తంగా విశేష స్పందన లభించింది.

క్రీడాకారులకు విజయ శుభాకాంక్షలు

ఈ సందర్భంగా ముఖ్య అతిథిగా మాట్లాడిన శ్రీ పోలూరి కుమారస్వామి గారు మాట్లాడుతూ,

“చదరంగం కేవలం ఒక ఆట మాత్రమే కాదు, అది క్రమశిక్షణ, ఆలోచనా శక్తి, సహనం మరియు నిర్ణయ సామర్థ్యాన్ని పెంపొందించే విద్య. రాష్ట్రం నలుమూలల నుంచి వచ్చిన ప్రతిభావంతులైన క్రీడాకారులు తమ అత్యుత్తమ ప్రతిభను కనబర్చి జాతీయ స్థాయిలో ఆంధ్రప్రదేశ్‌కు పేరు తీసుకురావాలని కోరుకుంటున్నాను. గెలుపు, ఓటములను సమానంగా స్వీకరిస్తూ క్రీడాస్ఫూర్తితో ఆడాలి. ఈ పోటీల ద్వారా ఎంపికయ్యే క్రీడాకారులు జాతీయ చెస్ ఛాంపియన్‌షిప్‌లో రాష్ట్రానికి ప్రాతినిధ్యం వహించి విశిష్ట విజయాలు సాధించాలని ఆకాంక్షిస్తున్నాను” అని అన్నారు.

రాష్ట్ర చెస్ సంఘం శుభాకాంక్షలు

ఆంధ్రప్రదేశ్ చెస్ అసోసియేషన్ అధ్యక్షులు శ్రీ ఏ. సురేష్, చైర్మన్ శ్రీ కె.వి.వి. శర్మ, కార్యదర్శి శ్రీ కె. జగదీష్ కుమార్, మరియు ఏపీ స్టేట్ ఆర్గనైజింగ్ సెక్రెటరీ శ్రీ N.M. ఫణి కుమార్

పోటీల్లో పాల్గొంటున్న ప్రతి క్రీడాకారునికి శుభాకాంక్షలు తెలియజేశారు. ఈ పోటీల్లో అత్యుత్తమ ప్రతిభ కనబరిచిన క్రీడాకారులు జాతీయ చెస్ ఛాంపియన్‌షిప్ 2026 కు ఎంపిక అవుతారని తెలిపారు.

సాంకేతిక సమావేశం

పోటీల ప్రారంభానికి ముందు చీఫ్ ఆర్బిటర్ శ్రీ అబ్దుల్ నబీ గారు సాంకేతిక సమావేశాన్ని నిర్వహించి, పోటీ నిబంధనలు, ఫిడే నియమాలు, టై బ్రేక్ విధానాలు, క్రీడాకారుల బాధ్యతలు తదితర అంశాలను వివరించారు.

ఈ టోర్నమెంట్ మొత్తం 7 రౌండ్ల ఓపెన్, 6 రౌండ్లు ఉమెన్ కి స్విస్ లీగ్ విధానంలో నిర్వహించబడుతోంది. మొదటి రౌండ్ ఉదయం 9:30 గంటలకు ప్రారంభమైంది.

ఆర్బిటర్ల సేవలు

ఈ పోటీలకు చీఫ్ ఆర్బిటర్‌గా శ్రీ అబ్దుల్ నబీ, డిప్యూటీ చీఫ్ ఆర్బిటర్‌గా శ్రీ కిరణ్ కుమార్ పాలూరి వ్యవహరిస్తుండగా, శ్రీమతి ఎస్. శ్యామల (ఏలూరు), తదితర ఆర్బిటర్లు పోటీల నిర్వహణలో సేవలందిస్తున్నారు.

అద్భుత ఏర్పాట్లు

టోర్నమెంట్ నిర్వాహకులు శ్రీ కుమారస్వామి గారు క్రీడాకారులు, తల్లిదండ్రులు, అధికారులు మరియు ఆర్బిటర్లకు ఎలాంటి అసౌకర్యం కలగకుండా అన్ని ఏర్పాట్లు సమర్థవంతంగా చేసి పోటీలు సజావుగా జరిగేలా కృషి చేశారు. పాల్గొన్న క్రీడాకారులు, కోచ్‌లు మరియు చెస్ వర్గాలు నిర్వాహకులను అభినందించాయి.

🖋️ DNN NEWS స్పోర్ట్స్ డెస్క్

📍 చీరాల జిల్లా

🌐 DNN NEWS – ప్రజల గొంతుక