వారం రోజులుగా లీకవుతున్న మంచినీటి పైపులైన్

జగిత్యాల, |జూన్ 7 Sun |DNN న్యూస్:

జగిత్యాల మున్సిపల్ పరిధిలోని 3వ వార్డులో శ్రీయన్ హాస్పిటల్ ఎదురుగా ఉన్న మంచినీటి సరఫరా పైపులైన్ పగిలి వారం రోజులుగా నీరు వృథాగా రోడ్డుపై ప్రవహిస్తుండటంతో స్థానిక ప్రజలు తీవ్ర ఇబ్బందులు ఎదుర్కొంటున్నారు.

పైపులైన్ లీకేజీ కారణంగా రోడ్డుపై నిరంతరం నీరు నిల్వ ఉండటంతో పాదచారులు, వాహనదారులు రాకపోకల్లో ఇబ్బందులు పడుతున్నారు. నీటి గుంటలు ఏర్పడటంతో దోమల వ్యాప్తి పెరిగే అవకాశం ఉందని, దీనివల్ల ప్రజారోగ్య సమస్యలు తలెత్తే ప్రమాదం ఉందని స్థానికులు ఆందోళన వ్యక్తం చేస్తున్నారు.

ఈ సమస్యను వెంటనే పరిష్కరించాలని 3వ వార్డు కౌన్సిలర్ రాగుల ప్రదీప్ మున్సిపల్ అధికారులను కోరారు. పగిలిన పైపులైన్‌కు అత్యవసరంగా మరమ్మతులు చేపట్టి, రోడ్డుపై నిల్వ ఉన్న నీటిని తొలగించే చర్యలు తీసుకోవాలని డిమాండ్ చేశారు.

ప్రజల ఆరోగ్యం, రవాణా భద్రత దృష్ట్యా సంబంధిత శాఖ అధికారులు తక్షణమే స్పందించి సమస్యను శాశ్వతంగా పరిష్కరించాలని స్థానికులు విజ్ఞప్తి చేస్తున్నారు.

___________________________________________________

🖋️ రిపోర్టర్: సురేష్ సుంచు

📍 జగిత్యాల జిల్లా

🌐 DNN NEWS – ప్రజల గొంతుక