గుంటూరు, జూన్ 1 (డీఎన్ఎన్ న్యూస్ డెస్క్):
ఖరీఫ్ సీజన్ ప్రారంభమైన నేపథ్యంలో రైతులు, కౌలురైతులు ఎదుర్కొంటున్న సమస్యలను ప్రభుత్వం తక్షణమే పరిష్కరించాలని ఆంధ్రప్రదేశ్ కౌలురైతు సంఘం జిల్లా సమితి డిమాండ్ చేసింది. ఈ మేరకు సోమవారం గుంటూరులో నిర్వహించిన గ్రీవెన్స్ కార్యక్రమంలో జిల్లా జాయింట్ కలెక్టర్కు వినతిపత్రాన్ని సమర్పించింది.
ఈ సందర్భంగా సంఘం నాయకులు మాట్లాడుతూ రాష్ట్ర ప్రభుత్వం ఇప్పటి వరకు ఖరీఫ్ ప్రణాళిక, విత్తన ప్రణాళిక, రుణ ప్రణాళికలను ప్రకటించకపోవడం రైతుల్లో ఆందోళన కలిగిస్తోందన్నారు. సాగునీటి కాలువలు పూడికతో నిండిపోవడం, గేట్లు దెబ్బతినడం, లిఫ్ట్ ఇరిగేషన్ పథకాలు మరమ్మతులకు నోచుకోకపోవడం వల్ల సాగునీటి సరఫరాపై అనిశ్చితి నెలకొన్నదని ఆవేదన వ్యక్తం చేశారు. వర్షాభావ పరిస్థితులపై నిపుణులు హెచ్చరిస్తున్న నేపథ్యంలో ప్రభుత్వం ముందస్తు చర్యలు చేపట్టాలని కోరారు.
రైతులకు అవసరమైన అన్ని రకాల విత్తనాలు, పచ్చిరొట్ట విత్తనాలను అధిక రాయితీపై అందించడంతో పాటు కల్తీ, నాసిరకం విత్తనాల విక్రయాలను కట్టడి చేయాలని డిమాండ్ చేశారు. ఎరువుల ధరలు తగ్గించి, వ్యవసాయ అవసరాలకు వినియోగించే డీజిల్, పెట్రోల్పై పన్నులు తగ్గించాలని కోరారు. పెరిగిన సాగు ఖర్చులకు అనుగుణంగా స్కేల్ ఆఫ్ ఫైనాన్స్ పెంచి, పూచీకత్తు లేకుండా రూ.5 లక్షల వరకు పంట రుణాలు అందించాలని విజ్ఞప్తి చేశారు.
అన్నదాత సుఖీభవ పథకం కింద రైతులు, కౌలురైతులకు అందించే ఆర్థిక సహాయాన్ని పెంచాలని, కౌలురైతుల గుర్తింపు కార్డుల జారీ ప్రక్రియను సరళీకృతం చేసి అన్ని ప్రభుత్వ పథకాలను వారికి వర్తింపజేయాలని కోరారు. అలాగే వ్యవసాయ యంత్ర పరికరాలను సబ్సిడీపై అందించడంతో పాటు పొగాకు రైతులకు నాణ్యత ఆధారంగా గిట్టుబాటు ధర కల్పించాలని డిమాండ్ చేశారు.
మొక్కజొన్న రైతులకు ధరల వ్యత్యాస భృతి చెల్లించడం, వర్షాభావం మరియు తెగుళ్ల కారణంగా నష్టపోయిన ఉద్యాన పంటల రైతులకు తగిన పరిహారం అందించడం వంటి అంశాలను కూడా వినతిపత్రంలో ప్రస్తావించారు.
ఈ సందర్భంగా సీపీఐ జిల్లా కార్యదర్శి కోట మాల్యాద్రి, కౌలురైతు సంఘం జిల్లా అధ్యక్షుడు కంజుల విఠల్రెడ్డి, ప్రధాన కార్యదర్శి పి.వి. జగన్నాదం, జిల్లా రైతు సంఘం అధ్యక్షుడు కొల్లి రంగారెడ్డి మాట్లాడుతూ రైతాంగ సమస్యల పరిష్కారానికి ప్రభుత్వం ప్రత్యేక కార్యాచరణ చేపట్టాలని కోరారు.
అనంతరం జిల్లా జాయింట్ కలెక్టర్కు వినతిపత్రం అందజేశారు. ఈ కార్యక్రమంలో రావుల అంజిబాబు, పచ్చల సాంబశివరావు, ముప్పాళ్ల శివ, పుప్పాల సత్యనారాయణ, నూతలపాటి వెంకటేశ్వరరావు తదితరులు పాల్గొన్నారు.డేట్లైన్: డీఎన్ఎన్ న్యూస్ డెస్క్, గుంటూరు | సోమవారం, 01 జూన్ 2026
